संखुवासभा । जिल्लाको सदरमुकाम खाँदबारी देखि पाँचखपन नगरपालिका जाने खाँदबारी–बडरेनी सडकको मर्मत गर्न थालेको छ । मंगलबार देखि मर्मत कार्य शुरुवात गरिएको र अझै एक÷दुई दिन लाग्ने खाँदबारी नगरपालिकाले जनाएको छ ।
खाँदबारी नगरपालिकाको जेसिभीले सडक मर्मत गरेको हो । खाँदबारी नगरपालिका–८ स्थित जिरोप्वाइन्ट रातमाटे देखि बडरेनी सम्मको साढे ४ किमि सडकको मर्मत गरिएको खाँदबारी नगरपालिकाका मेयर महेश थपलियाको स्वकीय सचिव गोकुल खनालले बताए । उनको अनुसार, मेयरसापको निर्देशनमा रातमाटे देखि बडरेनी सम्मको सडकखण्ड बर्खाको भलबाढीले क्षतविक्षत् बनाएको र यातायात आवातजावातमा सहज बनाउन नगरपालिकाको स्रोतबाट मर्मत संम्भार गरिएको हो ।
बर्खाको पानीले सडक बिगारेकाले यातायातका साधानहरु आवातजावातमा अत्यन्तै धेरै समस्या देखिएपछि मर्मत गरिएको नगरपालिकाको भनाइ छ । खाँदबारी देखि बडरेनी सम्म खाँदबारी नगरपालिकाको क्षेत्र पर्दछ भने खोलादेखि पारि पाँचखपन नगरपालिका पर्दछ । उक्त सडकद्धारा खाँदबारी–बडरेनी हुर्दै पाँचखपनको वाना बजार हुदैं चैनपुर सम्म आवातजावात गर्न सकिन्छ । यो सडक यस क्षेत्रको मुख्य सडक समेत हो ।
सडकको दायाँबायाँ नाली काट्ने, खाल्डो पुर्ने लगायतको काम गरिएको खाँदबारी नगरपालिका ८ नम्बर वडाका वडासदस्य उमेश श्रेष्ठले बताए । उनले सडकको मर्मत पछि आवातजावात गर्न निकै सहज भएको बताए ।
भदौको अन्तिम भईसकेकाले बर्खाको पानी पर्न समेत कम भएकाले अब सडक मर्मत गर्दा त्यति धेरै नबिग्रीने र चाडपर्व समेत नजिकिदै गएकाले समस्या नहुने नगरपालिकाको भनाइ छ ।
