संखुवासभा । जिल्लाको खाँदबारी नगरपालिका–४ पांमास्थित भगीवन्त रंगशालामा नवौं पांमा कप आमन्त्रित पुरुष फुटबल प्रतियोगिता शुरु भएको छ ।
सोमबार एक समारोह बीच खाँदबारी नगरपालिकाका नगर प्रमुख महेश थपलियाले नौ वटा मैनबत्ती बालेर प्रतियोगिताको औपचारिक रुपमा उद्घाटन गरेका थिए ।
नगर प्रमुख थपलियाले ब्याबसायिक खेलकुदको विकासको लागि खाँदबारी नगरपालिकाले सहयोग गर्ने र आगामी दिनमा अझै ठूलो प्रतियोगिता गर्न नगरपालिकाले सहयोग गर्ने बताए । किराँतहरुको महानपर्व उधौली धान्यपूर्णिमाको सम्पूर्ण महानुभावहरुलाई नगर प्रमुख थपलियाले शुभकामना दिए ।
प्रतियोगिताको पहिलो दिन पहिलो खेल आयोजक लोहोरुङ क्लब र मकालु फ्रेन्डस क्लब बीच प्रतिस्पर्धा भएको थियो । खेलको शुरुमा नै आयोजक लोहोरुङ क्लबका सौर्य राउतले १ गोल गर्दै अग्रता दिलाएका थिए । त्यसको केहीसमय पछि मकालु फ्रेन्डसका अनिश परियारले १ गोल फर्काए भने हाफ टाइम पछि पुनः मकालु फ्रेन्डसका युवराज ढकालले १ गोल थप गर्दै १ को विरुद्ध २ गोल गर्दै विजयी बने ।
त्यसैगरि दोस्रो खेल सभापोखरी क्लब र तीनपोखरी क्लब बीच भएको थियो । सभापोखरीले तीनपोखरीलाई शुन्यको विरुद्ध २ गोल गर्दै विजयी बने ।
उक्त प्रतियोगितामा पूर्वका नाम चलेका आयोजक लोहोरुङ क्लब, सेकाहा क्लब, मकालु फ्रेन्डस, खाँदबारी युथ क्लब, तीनपोखरी क्लब, सभापोखरी क्लब, एडभान्स क्लब र सोमबार क्लब (भोजपुर) लगायत ८ वटा क्लबको सहभागीता रहेको प्रतियोगिता संयोजक ध्यानसिं राईले बताए ।
‘स्वास्थ्यका लागि खेलकुद, राष्टका लागि खेलकुद’ भन्ने नारासहित किराँतहरुको महानचाड उद्यौली पर्व धान्य पूर्णिमाको अवसरमा आयोजना भएको प्रतियोगिता १९ मंसिर ढाडेबजारको दिन समापन हुनेछ ।
प्रतियोगिताका विजेताले नगद २ लाख ५० हजार, टफि, मेडल र प्रमाणपत्र, उपविजेतालाई नगद १ लाख, टफि, मेडल र प्रमाणपत्र रहेको छ । त्यसैगरि सान्त्वना पुरस्कार दुई टिमलाई नगद २५/२५ हजार रुपैया रहेको छ ।
