संखुवासभा । संखुवासभाको खाँदबारी नगरपालिका—७ स्थित खाँदबारी रंगशालामा प्रथम तीनपोखरी कप फुटबल प्रतियोगिता शुरु भएको छ ।
विहिबार एक कार्यक्रम बीच खाँदबारी नगरपालिकाका मेयर महेश थपलियाले पानसमा बत्ती बालेर कार्यक्रमको उद्घाटन गरे । उनले नगरभित्रका क्लब र खेलाडीलाई ब्यावसायिक बनाउन सकेसम्मको सहयोग गर्ने प्रतिबद्धता जनाउर्दै खाँदबारी रंगशाला नगरभित्रको सबैभन्दा महत्वपूर्ण रंगशाला भएकाले डिपिआर बनाएर पाराफिट सहितका सुविधा सम्पन्न खेलमैदान बनाउन लागिपर्ने बताए ।
आज भएको पहिलो खेलमा सितलपाटी एफसी र लोहोरुङ क्लब बीच भएको थियो । सितलपाटीले ३–१ गोल गर्दै लोहोरुङलाई हराए । निकै बलियो मानिएको लोहोरुङ क्लब पहिलो खेलबाट नै आउट भए । त्यसैगरि दोस्रो खेल मकालु फ्रेन्ड्स र आयोजक तीनपोखरी (रातो) बीच भएको थियो । मकालु फ्रेन्डसले ३–० गोलको सहज जीत निकाले । मकालुले पेलान्टी पाएर १ गोल थपेका थिए ।
प्रतियोगितामा सशस्त्र प्रहरी कोशी प्रदेश पकली, इटहरी फुटबल क्लब, भड्साबारी फुटबल क्लब, हिले फुटबल, सितलपाटी क्लब, लोहोरुङ क्लब, खाँदबारी युथ क्लब, एडभान्स क्लब, मकालु फ्रेन्ड्स, तुम्लिङटार स्र्पोटिङ्ग क्लब र आयोजक तीनपोखरी क्लब (रातो र सेतो दुई टिम) सहित १२ टिमको सहभागिता रहेको छ ।
प्रतियोगिताको बिजयी टिमलाई नगद २ लाख २२ हजार २ सय २२ रुपैया सहित ट्रफी, मेडल र प्रमाणपत्र प्रदान गरिने आयोजकले जनाएको छ । उपविजेताले नगद १ लाख ११ हजार १ सय ११ सहित ट्रफी, मेडल र प्रमाणपत्र पाउनेछ । प्रतियोगिता माघ १ गतेसम्म सञ्चालन हुनेछ ।
