संखुवासभा । संखुवासभाको खाँदबारी नगरपालिका–७ स्थित मंगलादेवी माध्यमिक विद्यालय तीन पोखरीमा पाँच लाख रुपैयाँको अक्षयकोष स्थापना भएको छ ।
विद्यालयमा अध्ययनरत गरिब तथा जेहेन्दार विद्यार्थीको पठनपाठनमा सघाउ पु-याउने उद्देश्यले विद्यालयमा स्थानीय समाजसेवी स्वर्गीय ल्याप्टेन चिमबहादुर राई र उहाँको पत्नी जयमाया राईको स्मृतिमा कोष स्थापना गरिएको हो । चिमबहादुर र जयमाया दम्पतिका दुई छोराहरू अजितकुमार राई र दिपबहादुर राईले गरिब तथा जेहेन्दार विद्यार्थीको अध्ययनमा सघाउन पाँच लाखको कोष स्थापना गरेको बताए ।
दाताहरुले विहिबार विद्यालयमा एक कार्यक्रम बीच विद्यालय ब्यबस्थापन समितिका अध्यक्ष तुलाराम मगरलाई अक्षयकोषमा रहने रकम हस्तान्तरण गरेका थिए । विद्यालय समितिका अध्यक्ष मगरले अक्षय कोष दाताहरुलाई धन्यवाद प्रकट गरेका थिए ।
