संखुवासभा । खाँदबारी नगरपालिकाले नेवारी समुदायको हिले/रोपाई जात्रा पर्वको अवसरमा आज (शुक्रबार) सार्वजनिक विदा दिएको छ ।
खाँदबारी नगरपालिकाले सुचना जारी गर्दै शुक्रबार खाँदबारी नगरपालिकाको कार्यालय, ११ वटै वडा कार्यालय र मातहत रहेका सम्पूर्ण विद्यालयहरुमा सार्वजनिक विदा दिइएको जनाएको हो ।
नेवारी समुदायको बाहुल्यता रहेको खाँदबारी बजार र आसपासका क्षेत्रमा बसोबास गर्ने सम्पूर्ण नेवाः समुदायको सम्मान, नगरपालिकाको मौलिक अमूर्त सम्पदाको संरक्षणको रुपमा रहेको हिले/रोपाई जात्रा पर्व अवसरमा सार्वजनिक विदा दिएको खाँदबारी नगरपालिकाका प्रमुख प्रशासकीय अधिकृत निर्माणकुमार कार्कीले जानकारी दिए ।
जात्राको अवसरमा शुक्रबार एकदिन खाँदबारी नगरपालिका र मातहतका कार्यालयहरुको सम्पूर्ण सेवा प्रवाह बन्द रहने गरि सार्वजनिक विदा दिइएको र सबैतिर सुचना प्रवाह गरिएको नगरपालिकाको भनाइ छ ।
संखुवासभाको नेवार समुदायको वसोवास रहेको मुख्यबस्तीहरु सदरमुकाम खाँदबारी, चैनपुर, सिभुवा, खराङ, बाह्रविसे, मानेभञ्जाङ्ग, तुम्लिङ्टार लगायतका क्षेत्रहरुमा बर्सेनि भब्य रुपमा जात्रा पर्व मनाउने गरिन्छ । नागपञ्चमी देखि शुरु हुने जात्रा पर्व कृष्णाजन्माष्टमी पछि अन्त्य हुने गर्दछ । जात्रा पर्व हेर्न गाउँ–गाउँबाट खाँदबारीमा मानिसहरुको भीड लाग्ने गर्दछ ।
