संखुवासभा । निजामती सेवा दिवस २०८२ को अवसरमा आयोजित अन्तर ट्रेड युनियन फुटसल प्रतियोगिता सम्पन्न भएको छ ।
विहीबार र शुक्रबार दुई दिन खाँदबारीस्थित फुटसलमा आयोजित अन्तर ट्रेड युनियन फुटसल प्रतियोगितामा नेपाल निजामती कर्मचारी युनियन प्रथम भएको छ भने प्रतियोगितामा नेपाल राष्ट्रिय कर्मचारी संगठन द्धितिय भए भने कर्मचारी मिलन केन्द्र तृतीय भएको नेपाल कर्मचारी युनियन संखुवासभाका अध्यक्ष जुनकुमार राईले बताए ।
प्रतियोगिताका विजेताले नगद १० हजार, मेडल र प्रमाणपत्र प्राप्त गरे भने द्धितियले नगद ७ हजार, मेडल र प्रमाणपत्र प्राप्त गरे । त्यसैगरि तृतीयले नगद ५ हजार, मेडल र प्रमाणपत्र प्राप्त गरेका थिए । प्रतियोगिता कर्मचारी मिलन केन्द्र र संयुक्त टे«ड युनियन संखुवासभा (नेपाल कर्मचारी युनियन, नेपाल कर्मचारी संगठन र नेपाल राष्ट्र्रिय कर्मचारी संगठन निजामति) ले आयोजना गरेको हो ।
‘ब्याबसायिक र सिर्जनशील प्रशासन, विकास समृद्धि र सुशासन’ भन्ने नारा सहित विहीबार देखि विविध सप्ताहब्यापी कार्यक्रम खाँदबारीमा शुरु भएको हो । उक्त सप्ताहब्यापी कार्यक्रम अन्तर्गत विहिबार बिहान खाँदबारी नगरपालिका गेटदेखि लबिङ हिलसम्म करिव २ किलोमिटर सडक सरसफाई गरिएको थियो । उक्त सरसफाई कार्यक्रममा प्रमुख जिल्ला अधिकारी सिर्जना थपलिया सहित विभिन्न सरकारी कार्यालयका प्रमुख र कर्मचारीहरूको उल्लेख्य सहभागिता रहेको थियो । त्यसैगरि अन्तर कर्मचारी ब्याडमिन्टन प्रतियोगिता आयोजना गरिने जनाएको छ ।
उक्त सप्ताहव्यापी कार्यक्रमको समापन २२ गते आइतबार प्रभात फेरीसहित हुने भएको छ । सोही दिन विभित्र खेलकुद तथा प्रतियोगितामा उत्कृष्ट प्रदर्शन गर्ने टोली र व्यक्तिहरूलाई पुरस्कार वितरण गरिने जनाएको छ ।
