संखुवासभा । जिल्लाको खाँदबारी नगरपालिका–५ माल्टाको सरस्वती माध्यमिक विद्यालयमा आफन्तको नाममा दाताहरु अक्षय कोष स्थापना गरिदिएका छन् ।
गएको बुधबार विद्यालयमा माल्टाका स्थानीय बुद्धिजीवी तथा शिक्षाप्रेमी हाल अमेरिकामा बसोबास गर्दै आएका नवीन पुरी र उनको श्रीमती अम्बिका भट्टराई पुरी, आमा तिलमाया पुरी तथा समस्त परिवारवाट आफ्ना स्वर्गीय श्रीमान तथा पिता दुर्गबहादुर पुरीको नाममा विद्यालयमा एक लाख एक हजार १११ रुपैयाको अक्षय कोष स्थापना गरिदिएका हुन् । सो रकमको ब्याजले विद्यालयको शैक्षिक उन्नयनको लागि केही टेवा पुगोस भनेर अक्षय कोष स्थापना गरिदिएको दाताको भनाइ छ ।
दाताहरुलाई विद्यालय ब्यबस्थापन समिति अध्यक्ष विकास घिमिरे, प्रधानाध्यापक डबलराज जैशी, वडाध्यक्ष टंकबहादुर घिमिरे लगायतले धन्यवाद दिए ।
विश्वको जुनसुकै ठाउँमा आफ्नो कर्मथलो बनाएपछि जन्मथलो नबिर्सिन आग्रह गर्दै अन्य मनकारी दाताहरुले समेत विद्यालयको शैक्षिक विकासको लागि सहयोग गर्न सधै ढोका खुल्ला रहेको विद्यालय परिवारको भनाइ छ ।
