संखुवासभा । संखुवासभा जिल्लामा नौ हजार ३५ जना किशोरीहरुलाई पाठेघरको मुखको क्यान्सरविरुद्धको एचपीभी खोप लगाइने भएको छ ।
मंगलबार खाँदबारीमा स्वास्थ्य कार्यालय संखुवासभाले जिल्ला खोप समन्वय समिति, नागरिक समाज र संचारकर्मी लगायतका सरोकारवालालाई भेला गराएर राष्ट्रिय अभियानको रुपमा संचालन भएको पाठेघरको मुखको क्यान्सरविरुद्धको एचपीभी खोपबारेमा जानकारी दिएको हो ।
कार्यक्रममा जिल्ला समन्वय समिति संखुवासभाका प्रमुख सुमन शाक्यले खोप अभियानबाट कोही पनि बञ्चित नहुने गरि अभियानलाई सफल बनाउनुपर्ने बताए । त्यसैगरि जिल्ला अस्पतालका निमित्त मेडिकल सुपरिटेन्डेण्ड डा. सन्तोष देवले किशोरीहरुले लगाउनै पर्ने खोप भएकाले अभियान प्रभावकारी बनाउन सबैले भूमिका खेल्नुपर्ने बताए
जिल्लाका दश वटा स्थानीय तहमध्ये दुर्गम भोटखोला गाउँपालिका बाहेक नौ वटा स्थानीय तहका माघ २७ देखि फागुन २ गते सम्म खोप अभियान संचालन हुन लागेको स्वास्थ्य कार्यालय संखुवासभाका प्रमुख नारदमुनी सुवेदीले बताए । उनको अनुसार, भोटखोला गाउँपालिकामा फागुन १८ देखि २० सम्म संचालन गरिने स्वास्थ्य कार्यालय प्रमुख सुवेदीको भनाइ छ ।
जिल्लाको उत्तरी भेगमा रहेको विकट र दुर्गम भोटखोला गाउँपालिका हो । उक्त गाउँपालिका भित्रका अधिकांश विद्यालय जाडोका कारण बन्द भएकाले खोप अभियान पछाडी सारिएका स्वास्थ्य कार्यालय संखुवासभाको भनाइ छ । विकट र भौगोलिक अवस्थाले केहीदिन खोप अभियान सार्नु परेको बताइएको छ । खोपकर्तालाई विभिन्न तालिम, अभिमुखीकरण सहित तीव्र तयारीमा जुटेको स्वास्थ्य कार्यालयको भनाइ छ ।
जिल्लाका नौ वटा स्थानीय तहमा खोप अभियान एकै साथ शुरु हुनेछ । भ्याक्सीन वाहेक सम्पूर्ण सामाग्री स्थानीय तहमा पठाइ सकिएको स्वास्थ्य कार्यालय संखुवासभाका सुचना अधिकारी तथा जनस्वास्थ्य अधिकृत रोषण श्रेष्ठले बताए । संखुवासभामा कक्षा ६ देखि १० सम्मका ७ हजार छ सय ६२ विद्यार्थी र विद्यालय नजाने १० देखि १४ वर्ष उमेरका १ हजार ३ सय ७३ किशोरी रहेको श्रेष्ठले जानकारी दिए ।
संखुवासभामा १ सय ४४ विद्यालयका २ सय ७६ खोपकेन्द्र रहेका छन् । देशभरी नै राष्ट्रिय अभियान अन्तर्गत एचपिभि खोप माघ २२ देखि फागुन ७ गतेसम्म १५ दिन संचालन भइरहेको छ ।
