संखुवासभा । ‘स्वास्थ्यको लागि खेलकुद : राष्ट्रको लागि खेलकुद’ भन्ने नारासहित किराँतहरूको महान पर्व उधौली तथा धान्यपूर्णिमाको अवसरमा खाँदबारी नगरपालिका– ४ पांमास्थित भगीवन्त रंगशालामा सातौँ पांमा कप फुटबल प्रतियोगिता आयोजना हुने भएको छ।
आयोजक लोहोरुङ क्लवले खाँदबारीमा पत्रकार सम्मेलन गर्दै सातौँ पांमा कप आमन्त्रित फुटबल प्रतियोगिताको जानकारी दिएको हो।
फुटबलको विकास, आधुनिकीकरण र खेलाडीको व्यावसायीकरण गर्ने उद्देश्यले फुटबल प्रतियोगितालाई विगतमा जस्तै निरन्तरता दिइएको लोहोरुङ क्लबका महासचिव छत्रमणि काफ्लेले बताए। किराँतहरूको बाहुल्यता रहेको पांमाको परिचय र प्रचारप्रसारका लागि प्रतियोगिता गरिएको उनको भनाइ छ।
प्रतियोगिता आगामी पुस ७ देखि ११ गतेसम्म सञ्चालन हुने प्रतियोगिताका संयोजक ध्यानसिंह राईले जानकारी दिए। उनका अनुसार कोशी प्रदेशका विभिन्न जिल्लाका १२ क्लबको सहभागिता रहनेछ।
पुस ११ गते फाइनलको दिन मंसिरे ढाडे बजारसमेत लाग्ने भएकाले किराँतहरूको सांस्कृतिक कार्यक्रम साकेला नृत्यलगायतका प्रस्तुतिहरू रहने बताइएको छ।
प्रतियोगिताको विजेताले १ लाख ५१ हजार र उपविजेताले ८१ हजार रुपैयाँ तथा सेमिफाइनल पुग्ने २ टिमले २५र२५ हजार प्राप्त गर्ने आयोजकले जनाएको छ।
