संखुवासभा । संखुवासभाको दुर्गम उत्तरीक्षेत्र भोटखोलाका एक गर्भवती महिलाको हेलीकप्टरद्धारा उद्धार गरि विराटनगर पठाइएको छ ।
बुधबार जिल्लाको भोटखोला गाउँपालिका–४ नामासेका स्थानीय लामुछिरिङ भोटेलाई हेलीकप्टरद्धारा उद्धार गरी विराटनगर पठाइएको भोटखोला गाउँपालिकाका स्वास्थ्य संयोजक फूर्पू भोटेले बताए । उनको अनुसार, गर्भवती लामुछिरिङको गर्भबाट जुम्ल्याहा बच्चा भएको हुँदा एउटा बच्चा सकुशल सामान्य तरिकाले जन्म भएको तर दोस्रो बच्चाको अवस्था असामान्य भएको हुनाले हेलीबाट विराटनगर पठाइएको हो ।
राष्ट्रपति महिला उत्थान कार्यक्रम मार्फत भोटखोला गाउँपालिकाबाट लामुछिरीङलाई थप उपचारका लागि हेलिकप्टरबाट विटारनगर स्थित कोशी अस्पतालमा पठाइएको भोटखोला गाउँपालिकाका अध्यक्ष वाङछेदर भोटेले बताए । उनले राष्ट्रपति महिला उत्थान कार्यक्रमले हिमाली दुर्गम जिल्लाका सुत्केरीहरुको ज्यान बचाउन मद्धत गरेको समेत बताए ।
यसअघि पनि भोटखोला क्षेत्रका निकै महिलाहरुको राष्ट्रपति महिला उत्थान कार्यक्रम अन्तर्गत उद्धार भईसकेको छ । खाँदबारी–किमाथांका कच्ची सडक, त्यसमा बर्खाको समयमा सडकको बेहालत छ । सडक बिग्रेको कारणले भोटखोलाको नामासेबाट सदरमुकाम खाँदबारीमा रहेको जिल्ला अस्पताल पु¥याउन निकै सकस छ । गाडीबाट ल्याउदा ज्यानै समेत जान सक्ने खतरा भएकाले हेलीकप्टरबाट छिटो गरी उद्धार गर्न चौतर्फी पहल गरिएको गाउँपालिकाको भनाइ छ ।
