संखुवासभा । संखुवासभाको चिचिला गाउँपालिकाको चिचिलामा यहि असोज २७ गते शनिबार अन्तराष्ट्र्रिय साँस्कृतिक सम्मेलन हुने भएको छ ।
सोमबार खाँदबारीमा पत्रकार सम्मेलन गरि कार्यक्रमको बारेमा जानकारी दिएको हो । उक्त सम्मेलनमा भारत, अमेरिका र चीन प्रतिनिधीहरुको सहभागिता रहने जानकारी दिइयो ।
उक्त कार्यक्रम चिचिला गाउँपालिकाको आयोजना तथा मकालु साहित्य समाजको संयोजनमा हुन लागेको हो । चिचिला गाउँपालिकाको साँस्कृतिक तथा पर्यटनको प्रवर्धन गर्ने उद्देश्यका साथ सम्मेलनको आयोजना गर्न लागिएको चिचिला गाउँपालिका अध्यक्ष पासाङनुर्बू शेर्पाले बताए । उनले कार्यक्रममा मुख्य गरि भारत आसामका आदिवासी समुदाय कार्वी कुर्फाे आमेईको साँस्कृतिक टोलीको सहभागिता रहने बताए ।
कार्यक्रममा चिचिला गाउँपालिका भित्रका जातजातिहरुको साँस्कृतिक झाँकी प्रदर्शन गरिनेछ भने जिल्लाका अन्य स्थानीय तहहरुबाट समेत झाँकी सहितको जनप्रतिनिधीहरुको सहभागिता रहने आयोजकले जनाएको छ ।
कार्यक्रममा लोपोन्मुख रहेको हाक्पारे, ठाडो भाका, बिनायो, मुर्चुङ्गा, पिप्पिरी (पात बजाउने) कलाहरु समेत प्रदर्शन हुने गाउँपालिकाका प्रमुख प्रशासकीय अधिकृत शुक्रादेवी राईले जानकारी दिइन् । कार्यक्रममा स्थानीय उत्पादन तथा खाद्य पदार्थहरुको प्रदर्शनी पनि राखिने अधिकृत राईले बताइन् ।
कार्यक्रमको मुख्य उद्देश्य पर्यटन प्रवर्धन रहेको गाउँपालिका अध्यक्ष शेर्पाले जानकारी दिए । उक्त कार्यक्रम पश्चात आसामका कार्वी समुदाय बार्षिक रुपमा चिचिला गाउँपालिका आउने अध्यक्ष शेर्पाले बताए । हरेक बर्ष हिमालको पुजा गर्ने उक्त समुदायले चिचिला गाउँपालिकाको भुभागबाट मकालु हिमालको पुजा गर्ने भएपछि चिचिला गाउँपालिकाले उनीहरुसँग भगिनी सम्बन्ध विस्तार गर्दै साँस्कृति आदान प्रदान गर्ने नीति लिएको छ । सो अनुरुप अन्तराष्ट्र्रिय साँस्कृतिक सम्मेलनको आयोजना गर्न लागेको पालिका अध्यक्ष शेर्पाले स्पष्ट पारे ।
गाउँपालिकाले पालिका भित्रको उच्च क्षेत्रको भुभाग उपलब्ध (अस्थायी रुपमा) गराउनु पर्ने र सो क्षेत्रमा उनीहरुको धार्मिक संरचना निर्माण गर्ने सहमति भएको छ । सो स्थानबाट हरेक बर्ष कार्वी समुदाय आएर हिमालको पुजा गर्ने सहमति भएको छ । हरेक बर्ष सय जना भन्दा बढी हिमालको पुजा गर्नकै लागि चिचिला आउँदा त्यस क्षेत्रको स्थानीय उत्पादनले बजार पाउने गाउँपालिकाको अपेक्षा छ । उनीहरुकै माध्ययमबाट पनि पालिकाको प्रचार हुने समेत गाउँपालिकाको अपेक्षा रहेको पालिका अध्यक्ष शेर्पाले बताए ।
कार्यक्रममा नेपाल, भारत, चीन र अमेरिकाका प्रतिनिधीहरुसँग साँस्कृतिक विनिमय हुने भएकोले कार्यक्रमको नाम अन्तराष्ट्र्रिय साँस्कृतिक सम्मेलन राखिएको कार्यक्रमका संयोजक ताराबहादुर बुढाथोकीले जानकारी दिए । उक्त नाम राख्नका लागि परराष्ट्र मन्त्रालयसँग समन्वय गरिएको समेत बुढाथोकीले जानकारी दिए ।
