संखुवासभा । स्वास्थ्य कार्यालय संखुवासभा र करुणा फाउण्डेसनको सहकार्यमा आयोजित अपागंता रोकथामका लागि फोलिक एसिड चक्की सेवन सम्बन्धि भिडियो प्रतिस्पर्धामा संखुवासभाको पाँचखपन नगरपालिकाको जलजला हेल्थपोष्ट प्रथम बनेको छ ।
उक्त प्रतियोगितामा सिलिचोग गाउँपालिकाको बाला हेल्थपोष्ट द्धितिय बनेको छ भने मादी नगरपालिकाको बागा आधारभूत स्वास्थ्य सेवा केन्द्र तृतीय बनेको स्वास्थ्य कार्यालय संखुवासभाका जनस्वास्थ्य अधिकृत पशुपति खनालले बताए । उनको अनुसार, विजेताले प्रथम, द्धितिय र तृतीयले क्रमशः नगद ५ हजार, ३ हजार र २ हजार रुपैया प्राप्त गरेका छन् ।
प्रचारप्रसारका लागि तालिम, गोष्ठी मात्रै गर्ने परम्परालाई छोडेर नयाँ तरिकाबाट जनचेतनामुलुक भिडियो प्रतिस्पर्धा कार्यक्रमको आयोजना गरिएको जनस्वास्थ्य अधिकृत खनालको भनाइ छ । फोलिक एसिड चक्की सेवनको बारेमा धेरे भन्दा धेरै मानिसहरु सम्म सूचना पुरयाउनका लागि भिडियो प्रतिस्पर्धा कार्यक्रमको आयोजना गरिएको र धेरै मानिसहरु सम्म सूचना पुगेको अपेक्षा गरिएको खनाल बताउँछन् ।
उक्त प्रतियोगितामा जिल्लाभरका स्वास्थ्यकर्मीहरु २८ टिमले भाग लिएका थिए । तिमध्ये तीन वटा टिम छनौटमा परेको हो । सो प्रतियोगितामा जिल्लाभरका स्वास्थ्य संस्थामा कार्यरत स्वास्थ्यकर्मीहरुले मात्रै भाग लिन पाउने ब्यबस्था गरिएको थियो । उनीहरुले जन्मजात हुने अपागंता रोक्नका लागि फोलिक एसिड चक्की सेवनको महत्वबारेमा जानकारीमुलुक १ मिनेटको भिडियो बनाएर सामाजिक संजाल (फेसबुक)मा अपलोड गर्नुपर्ने नियम बनाइएको थियो । सो भिडियोको लिंक स्वास्थ्य कार्यालयमा पठाउनुपर्ने नियम थियो । छनौट प्रक्रियामा निर्णयकले बिषयबस्तु, भिडियोको गुणस्तर र अभिनयलाई ५० प्रतिशत र फेसबुकको लाइक, सेयर र भ्यूजलाई ५० प्रतिशत गरि १०० प्रतिशतमा निर्णय गरिएको स्वास्थ्य कार्यालय संखुवासभाले जनाएको छ ।
स्वास्थ्य कार्यालय र करुणा फाउण्डेसनले निर्णयकको भूमिका निर्वाह गरेको थियो । भिडियो प्रतिस्पर्धा नयाँ कार्यक्रम भएको र नागरिकसम्म प्रभावकारी रुपमा पुगेको अपेक्षा गरिएको स्वास्थ्य कार्यालय संखुवासभाका कार्यालय प्रमुख नारदमुनी सुवेदीले बताए । आमसर्वसाधारण महानुभावहरुलाई जन्मजात हुने अपागंता रोकथाम गर्नका लागि सन्तानको योजना बनाईरहेको महिला तथा पुरुष दुवैले फोलिक एसिड चक्की सेवन गर्न कार्यालय प्रमुख सुवेदीले आग्रह गरे ।
गत असार ४ गते सूचना जारी गरि भिडियो प्रतिस्पर्धामा भाग लिन आह्वान गरेको थियो भने १५ असार दिउँसो ४ बजेसम्म भिडियो पठाउन अनुरोध गरेको थियो । स्वास्थ्य कार्यालय र करुणा फाउन्डेसनले असार २३ गते नतिजा सार्वजनिक गरेको हो । संखुवासभामा करुणा फाउण्डेसनले जन्मजात हुने अपागंता रोक्न कार्यक्रम संचालन गरिरहेको छ ।
