संखुवासभा । जिल्लाको खाँदबारी नगरपालिका–५ माल्टामा अन्तरपालिका स्तरीय महिला भलिवल प्रतियोगिता शुरु भएको छ । सो प्रतियोगिताको आकर्षण राष्ट्रिय महिला खेलाडीहरु सुमित्रा रेग्मी र जेनिशा विश्वकर्मा समेत खेलिरहेकी छिन् ।
बुधबार प्रतियोगिताको एक कार्यक्रम बीच खाँदबारी नगरपालिकाका मेयर महेश थपलियाले उद्घाटन गरे । उनले सबै खेलाडीहरुलाई अनुशासित ढंगले प्रतियोगितामा सहभागीता जनाउन अनुरोध गर्दै खेलाडीहरु देशका गहना भएको बताए । संखुवासभाका खेलाडीहरु सुमित्रा रेग्मी र जेनिशा विश्वकर्मा राष्ट्रिय खेलाडी बनेकोमा गर्व लागेको बताउर्दै राम्रा खेल्ने खेलाडीहरुको भविष्य उज्वल रहेको मेयर थपलियाको भनाइ थियो ।
प्रतियोगिताको पहिलो दिन चार वटा खेल सम्पन्न भएका छन् । पहिलो खेल संखुवासभाको चैनपुर नगरपालिका र मोरङको लेटाङ नगरपालिका बीच प्रतिस्पर्धा भएको थियो । चैनपुरले लेटाङलाई २५–१०, २५–११ को सोझो सेटमा नै हराए ।
त्यसैगरि दोस्रो खेल संखुवासभाको खाँदबारी नगरपालिका र भोजपुरको षडानन्द नगरपालिका बीच भएको थियो । खाँदबारीले षडानन्दलाई २५–७, २५–७ को सोझो सेटमा नै हराए ।
त्यसैगरि तेस्रो खेल संखुवासभाको पाँचखपन नगरपालिका र भोजपुरको आमचौक गाउँपालिका बीच भएको थियो । पाँचखपनले आमचौकलाई २५–१५, २५–७ को सोझो सेटमा नै हराए ।
त्यसैगरि चौथो खेल संखुवासभाको चैनपुर नगरपालिका र संखुवासभाको चिचिला गाउँपालिका बीच प्रतिस्पर्धा भएको थियो । चैनपुरले चिचिलालाई २५–२, २५–९ को सोझो सेटमा नै हराए ।
राष्ट्रिय खेलाडीहरु सुमित्रा रेग्मी चैनपुर नगरपालिकाबाट खेलिरहेकी छिन् भने नेपाली राष्ट्रिय यु–२० महिला भलिवलका क्याप्टेन जेनिशा विश्वकर्मा खाँदबारी नगरपालिबाट खेलिरहेकी छिन् । उनीहरु आ–आफना नगरपालिकाबाट सहभागीता जनाएका हुन् । उनीका साथै चैनपुर, खाँदबारी र पाँचखपन नगरपालिकाले राष्ट्रियस्तरका नाम चलेका खेलाडीहरु प्रतियोगितामा सहभागी गराएका छन् ।
प्रतियोगितामा मोरङ, भोजपुर र संखुवासभाका गरि १० टिमको सहभागीता रहेको छ । संखुवासभाको १० वटा पालिकामध्ये खाँदबारी, चैनपुर, पाँचखपन, चिचिला, सिलीचोङ र सभापोखरी गाउँपालिकाले सहभागीता जनाएको छ भने मोरङको सुन्दरहरैचा नगरपालिका र लेटाङ नगरपालिका, भोजपुरको आमचौक गाउँपालिका र षडानन्द नगरपालिकाले सहभागीता जनाएको छ ।
खाँदबारी नगरपालिका ५ नम्बर वडा खेलकुद विकास समितिले बाला चतुर्दशी (अधेरी बजार)को पावन अवसरमा आज (बुधबार) देखी माल्टामा शुरु भएको प्रतियोगिता शुक्रबार समापन हुने खाँदबारी–५ का वडाध्यक्ष टंकबहादुर घिमिरेले जानकारी दिए ।
खाँदबारी–५ माल्टामा जन्मिएका भलिवल प्रशिक्षक कुमार राई समेत प्रतियोगितामा आएका छन् । प्रतियोगिताका विजेताले नगद १ लाख, शिल्ड, मेडल र प्रमाणपत्र प्राप्त गर्नेछ भने उपविजेताले नगद ७५ हजार, शिल्ड, मेडल र प्रमाणपत्र प्राप्त गर्नेछ । त्यसैगरि सेमिफाइनलिष्ट दुई टिमले नगद २५/२५ हजार, शिल्ड, मेडल र प्रमाणपत्र प्राप्त गर्नेछन् ।
