संखुवासभा । नेपाली काँग्रेसका भातृसंगठन नेपाल तरुण दल सभापोखरीले सडक वरपर बृक्षारोपण गरेको छ । शनिबार तरुण दलको अगुवाईमा सभापोखरी गाउँपालिकाको केन्द्र बाह्रबिसे बजारको भोटीखोला पुलबाट सभाखोला पुलसम्म करिब एक किमि पक्की सडकको दायाँबायाँ स्वामीको विरुवा रोपिएको हो । त्यसका साथै तरुण दलले सडक सरसफाई समेत गरेको थियो ।
उक्त बृक्षारोपण कार्यक्रममा सभापोखरी गाउँपालिकाका अध्यक्ष भीम सिङ्था लिम्बू र उपाध्यक्ष लक्ष्मी चापागाई लगायतको समेत उपस्थिती रहेको थियो । त्यसैगरि बाह्रबिसे प्रहरी चौकीका प्रहरीहरु, सभापोखरी गाउँपालिका भित्रका तरुण दलमा आबद्ध तरुण सदस्यहरुको समेत बृक्षारोपण कार्यक्रममा सक्रियतापूर्वक सहभागीता जनाएका थिए । नेपाल तरुण दलका जिल्ला सदस्य प्रेम लिम्बूले बृक्षारोपण कार्यक्रमको संयोजन गरेका थिए ।
तरुण साथीहरुलाई एकजुट बनाउर्दै रचनात्मक तवरले राष्ट्रनिर्माणमा योगदान पु-याउन सकियोस भन्ने सोचले बृक्षारोपण कार्यक्रमको आयोजना गरिएको नेपाली काँग्रेस सभापोखरीका सचिब बिश्वनाथ राईले बताए । उनले केही न केही सकारात्मक काम गर्नुपर्छ भन्ने सोचले बृक्षारोपण कार्यक्रमको आयोजना गरिएको बताए ।
बाह्रबिसे—धुपु खाँदबारी सडकखण्डको भोटीखोला पुलबाट सभाखोला पुलसम्म गाउँपालिकाको आफनै लगानीमा सडक कालोपत्रे गरिएको छ । सभापोखरीका तरुण दल निकै सक्रिय रहेको छ । गत ०८० फागुन २४ देखि २८ सम्म अन्तरपालिकास्तरीय पुरुष तथा महिला खुल्ला भलिबल प्रतियोगिताको समेत आयोजना गरेको थियो।
