संखुवासभा । पूर्वी पहाडी जिल्ला संखुवासभाको प्रसिद्ध धार्मिक तिर्थस्थल सिद्धकाली मन्दिर परिसरमा लक्ष्मीनारायणको मन्दिर पुनः निर्माणका साथ हस्तान्तरण गरीएको छ ।
चैनपुर नगरपालिका अन्तर्गत वडा नम्बर ३ मा पर्ने सिद्धकाली भगवतीको प्राङ्गणमा ,लक्ष्मी नारायणको मन्दिर पुनः निर्माण गरीएको हो । त्यसैगरी सतीदेबीको दाहिने आँखा पतन भएको स्थानमा अर्थात मन्दिर भन्दा करिब २ सय मिटर तल रहेको ठाउमा दाहिने आँखा राखेर दुर्गाको मूर्ति स्थापना गरीएको छ ।
मन्दिरको बिधिवत रूपमा उद्घाटन गरेर मन्दिर संरक्षण सम्बर्द्धन समितिलाई हस्तान्तरण समेत गरीएको छ । दाताहरु चन्दबहादुर डाँगीका सुपुत्र भरत डागि ,हरिराम डागि ,शिव डागिलगायतबाट मन्दिर स्थापनामा सहयोग गरीएको हो । मन्दिरको बिधिवत रुपमा जलमा नुहाएर राखिएको लक्ष्मीनारायण थलमा निकालेर मूर्ति स्थापना गरीएको हो ।
सतीदेबीको दाहिने आँखा पतन भएको यो धार्मिक तिर्थस्थल हरिनारायणको मन्दिर, दुर्गाको मूर्ति निर्माणसंगै यसको धार्मिक र पर्यटकीय दुष्टिकोणले महत्व बढ्दै गएकोछ । यसले सिंगो जिल्ला, कोशी प्रदेश मात्र नभएर नेपालभरका पर्यटकहरुलाई आकर्षित गर्ने छ । सिद्धकाली देवीको गरिमा झनै बढ्ने बिश्वास गरिएको छ ।
यसले यहाँका ऐतिहासीक कृति मात्र राख्ने छैन, छिमेकी मुलुकहरुबाट समेत भक्तजनको ध्यानाकर्षण गर्ने स्थानीयहरुको भनाइ छ ।
