संखुवासभा । नेपाल सरकारले जारी गर्न लागेको निजामती ऐनमा स्थानीय सेवाका कर्मचारीहरुको सेवा सुरक्षा लगायतका विषयमा अस्पष्टता रहेको भन्दै स्थानीय तहमा कार्यरत कर्मचारीले देशैभरी आन्दोलन गरिरहेको छ ।
सोही अनुसार शुक्रबार धर्मदेबी नगरपालिका मातहतका कार्यलयमा कार्यरत कर्मचारीले केन्द्रिय स्थानीय तह कर्मचारी हक हित संघर्ष समितीको निर्णयअनुसार केन्द्रिय समितिले गरेका दबाबमूलक कार्यक्रममा ऐक्यबद्धता जनाउदै शुक्रबार देखिनै अत्यावश्यक बाहेकका सम्पुर्ण कामहरु नगर्ने बताएका छन् ।
संघीयतामा मुलुक गएको लामो समय बितिसक्दा समेत निजामती सेवा ऐन हालसम्म पनि जारी नभएकोमा हाल जारी हुन लागेको विधेयकमा संघीय निजामती सेवा ऐनको सट्टा एकीकृत निजामती सेवा ऐन जारी गरिनु पर्ने,स्थानीय तहको प्रमुख प्रशासकीय अधिकृतको पद स्थानीय सेवाको नै रहने व्यवस्था गरिनु पर्ने,अस्थायी तथा करार कर्मचारीहरुको उचित व्यवस्था गरिनु पर्ने जस्ता माग राखेर कर्मचारीहरुले आन्दोलन गरिरहेका छन् ।
प्रेस बिज्ञाप्ति जारी गर्दै धर्मदेबिमा कार्यरत कर्मचारीले केन्द्रिय संघर्ष समितिले राखेको माग सम्बोधन गर्न जोडदार दबाब सहित माग गर्दै आन्दोलनका कार्यक्रमबाट सेवाग्राहीहरुमा पर्न गएको असुविधा प्रती क्षमा समेत मागेका छन्।
