संखुवासभा । राष्ट्रिय बाल दिवस २०८० को अवसरमा अनलाइन बक्तृत्व कला प्रतियोगिता डिजिटल स्पिच नेपालको आयोजना हुने भएको छ ।
संखुवासभाको खाँदबारीस्थित नागरिक चासो मल्टिमिडिया प्रा.लि.को आयोजनामा विश्वव्यापी रुपमा अनलाइन वक्तृत्वकला प्रतियोगिता हुने भएको हो । २० बर्षमुनिका बालबालिका तथा किशोरकिशोरीहरुको सहभागिता हुने गरि प्रतियोगिताको आयोजना गरिएको नागरिक चासोका अध्यक्ष संयोगान्त कुलुङले बताए । बालदिवसलाई लक्षित गरि राष्ट्र र राष्ट्रियताका विषयमा जुनसुकै स्थानबाट सहभागी हुन सक्ने उनले बताए ।
सो प्रतियोगितामा विश्वभर रहेका नेपाली भाषीहरु सहभागी हुन सक्नेछन् । सहभागी हुन चाहानेहरुले २० बर्षमुनिको प्रमाण सहित साउन मसान्त सम्ममा ५ मिनेट सम्मको सम्पादन नगरिएको भिडियो इमेल मार्फत पठाउनुपर्ने आयोजकले जनाएको छ । प्राप्त भिडियोलाई भाद्रको १ गते नागरिक चासोको सामाजिक सञ्जालमा राखिनेछ भने भाद्र २९ बाल दिवसको दिन अन्तिम नतिजा सार्वजनिक गरिने आयोजकले जनाएको छ ।
प्रतियोगिताका प्रथमलाई नगद १५ हजार र प्रमाणपत्र, द्वितीय हुनेलाई नगद पाँच हजार र प्रमाणपत्र र तृतीय हुनेलाई नगद २ हजार र प्रमाणपत्र प्रदान गरिने जनाएको छ ।
सामाजिक सञ्जाल फेसबुक पेज शिक्षा सामाजिक सञ्जाल पार्टर रहेको प्रतियोगिताको निर्णायक सार्वजनिक गरिएको छैन । डिजिटल माध्यमबाट माध्यमिक तहसम्म अध्ययन गरिरहेका विद्यार्थीहरुलाई लक्षित गरिएको छ । घरैमा बसेर मोवाइल फोन मार्फन नै भिडियो खिचेल वाक कला प्रस्तुत गरेर सहभागी हुन सकिने यो कार्यक्रमले धेरैको प्रतिभा उजागर गर्ने विश्वास रहेको आयोजकले जनाएको छ।
